GID POU KONPRANN PATI YON LÒT CHIMEN AN

I. Kisa PATI YON LÒT CHIMEN an ye?

Pati politik Yon Lòt Chimen se yon estrikti politik jenerasyonèl ki gen vizyon pou restore Ayiti e fè li redevni yon gran nasyon ki pwospè, ki mèt tèt li. Li vle fè Ayiti rekipere endepandans li, fyète ak diyite l atravè kwasans ekonomik, bon jan ledikasyon, sante pou tout moun, estabilite politik ak reyònman kilti peyi a. Pati a vle pou chak ayisyen kontribye nan rekonstriksyon yon Leta ki pou tout moun. Yon leta ki ka asire pwogrè pou chak fanmi. Yon leta ki kapab soutni epi pote ekleraj pou lòt pèp nan mond lan menm jan lit te fè ak deklarasyon endepandans lan.

Pati politik Yon Lòt Chimen pran nesans pou reponn ak briganday ki genyen sou sènn politik peyi a. Pati Yon Lòt Chimen vini pou l vini mete lòd nan bann dezòd ki ap fèt nan peyi a kote ayisyen pa konen ki sen pou yo rele, yo grangou, lavi chè, koripsyon ak kidnapin enpoze yo viv. Pati a konstate ke peyi Dayiti ap depafini depi 1987. Politisyen Ayisyen yo kontante yo fè pèp la pwomès ke yo konen yo pap Janm ka rive kenbe. Depi 1987 apre diktati a, peyi a nan yon tranzisyon demokratik san fen. Pagen pyès bilan pozitif ki soti nan tranzisyon demokratik si la a. O kontrè peyi a vin pi mal. Pwomès pou nouvo Ayiti a pa janm abouti ak anyen. Politisyen pwofesyonel yo pa rive respekte pyès nan angajman yo, okontrè yo vin pi maton nan koripsyon. Jenès la pa jwenn pyès ankadreman okontrè se ankouraje politisyen sa yo ankouraje yo pou yo kite peyi a. Moun ki rete yo ap pase nan yon je zegwi ak mizè. Tout mal peyi a tombe sou do jenès la. Politisyen yo toujou jwen fason pou yo manipile yo, twompe yo, vòlè avni yo pandan ke yo voye tout fanmi pa yo a letranje. Pati politik Yon Lòt Chimen leve kanpe pou pran desten peyi Dayiti an men, nan prezante yon lòt kalite lidèchip nan sosyete sivil la ak nan politik la.

Pati politik Yon Lòt Chimen konsidere tèt li kòm dènye enstitisyon ki gen repondong pou defann enterè pèp ayisyen an. Lite san relach kont koripsyon ki se yon fleo ki sou do peyi a. Lite kont afè klan politik la. Lite kont moun pa, kliyantelis, abi pouvwa, enkonpetans, ak neglijens. Pati Yon Lòt Chimen vle konstwi yon gwo maratón pou realize chanjman andedan peyi a. Li se yon repons a gwo kesyon jenerasyon sa ap poze: èske Ayiti ka chanje?

II. Poukisa nou mete sou pye pati sa a ?

Pati Yon Lòt Chimen kreye paske desten Ayiti menase. Paske pyès politisyen Ayisyen pa vle defann Ayiti ankò paske anpil ladan yo gen dosye kriminel ak koripsyon sou do yo. Dayè majorite polisyen Ayisyen ap tann blan pou vin delivre Ayiti. Nan langaj politisyen sa yo, yo toujou mete Ayiti nan aryè plan. Politisyen ki sou tèren an samble pa menm pale menm langaj ak moun yo ta dwe sèvi yo. Politisyen Ayisyen yo pèdi tout sa yo te genyen kòm konsyans, mizè pèp la pa di yo anyen. Yo pa vle mete tèt yo ansanm. Pati Yon Lòt Chimen vle fini ak leta kowonpi sa a paske yo fini e nan nivo yo rive la a yo paka resikle; dayè pyès nan yo pat janm te gen yon pwojè sosyete pou nasyonan. Ampil nan yo se kandida pwofesyonel yo devni paske se konsa yon ka fè kòb paske se fè kòb sou do pèp la ki enterese yo selman.

Se desizyon ak jefò politik tout moun ki pou retire Ayiti nan sa li ye la a. Se yon moman ki rive pou nou sansibilize tout moun ki renmen Ayiti pou nou ka sove ti rès ki rete a. Se yon egzijans istorik, pati sa a ouvri bra l pou l akeyi tout sa yo ki vle travay ansanm pou sove Ayiti. Pati a bezwen tout òganizasyon politik ak tout lòt enstitisyon sivil la ki gen ideoloji demokrat pwogresis pou pran angajman pou nou ka demare devlopman peyi a ansanm. Se yon obligasyon pou tout pitit peyi a patisipe nan rekonstriksyon li. Se yon obligasyon pou nou restore leta nou an. Nou dwe bay jenès nou an espwa pou yo gen yon demen miyò nan peyi a. Pati Yon Lòt Chimen santi se yon obligasyon pou l asire fòmasyon ak edikasyon pou prepare avni jenès la. Li vle diferan de pati tradisyonel yo ki la sèlman lè gen eleksyon. Pati Yon Lòt Chimen santi obligasyon pou l prepare yon pwojè sosyete ki montre koman li pral mete peyi a sou ray developman. Nan pati sa a pap gen tatonman, pran chans ak enpwovizasyon. Sitwaen yo dwe byen fòme ak byen enfòme paske se sitwaen avize ki fè yon leta avize. Bon sitwayen ak bon lidè paka nan pran chans, fòk gen zouti politik ki prepare yo. Pati politik Yon Lòt Chimen vle rasanble tout moun bò kote yon pwojè sosyete ki fè sans. Yon pwojè ki byen planifye epi ki ka kontinye pa nempòt lòt pati ki ta rive sou pouvwa. Paske nou gen responsablite pou nou transmèt ak jenerasyon kap vini yo yon zouti politik ki ka adapte a chak situasyon pou kondwi Ayiti sou wout developman dirab. Peyi saa soufri twòp, jenès la bezwen yon levye pou leve defi povrete ap bay nan peyi saa.

Pati Yon Lòt Chimen vle reveye konsyans politik chak sitwayen ki santi li lè li tan pou nou sove Ayiti. Pati a santi se responsablite l pou l reveye tout sa ki ap dòmi. Pati a ofri yon enstitisyon kote tout moun ka fè tande yo e chak moun ka bay fòm ak panse politik yo san enflyans politisyen manipilatè yo. Pati a gen detèminasyon pou l change vizaj Ayiti.

III. Eske se pa yon pati an plis ?

Sa depan de ki moun ki ap reponn kesyon sa a. Aparaman tout lidè politik sou tèren an pèdi tout kredibilite pou yo ta kondwi pèp la sou chemen developman. Ampil ladan yo pa menm gen yon program pou sosyete a. Pati Yon Lòt Chimen an pa yon pati an plis paske pati sa a gen yon vizyon, yon projè sosyete, yon misyon politik. Pati sa a pap chache conpare tèt li ak pyès lòt pati men si lòt pati yo te gen plan ak vizion nou pa tap nan sa nou ye jodi a nan peyi sa a. Se malere, men, tout pati politik yo sanble ak antrepriz prive moun ki te kreye yo a. Nou pa yon pati an plis paske pa gen yon pati ki te vini ak vizyon ak pwojè nou prezante nasyon an. Pat janm te gen yon pati politik ki te ap pouswiv yon projè sosyete ki te entegre tout kouch nan popilasyon an. Si te genyen se swa se te sèlman sou papye ou byen yo echwe deja. Nou vle Yon lòt chimen ki di sal vle fè ak sa li ka fè sanl pa chita ap fè pwomès selman pou moun ka mache dèyè yon lidè nan pati a pou l ka rive sou pouvwa. Peyi a bezwen yon lòt chimen pou li ka pran desten l an men. Kreyasyon pati sa a se repons ak absans moun serye ki ka fè yon politik serye ki pa gen sou tèren politik la. Se repons ak demann sa a kote Ayiti rive nan yon pwen kote l gen ekzijans pou devlope se yon lòt jenerasyon lidè ki dwe avanse ak pwojè sa a pou nou ka gen yon lòt sosyete.

IV. Kisa ki nouvo nan Pati Yon Lòt Chimen ?

Vizyon patia a se ide ak kwayans ki ka rann sosyete ayisyènn lan vin pi jis. Li vle fè yon diferans nan jan desizyon demokratik yo ap pran. Diferans nan libète pou moun di sa yo vle. Diferans nan egalite devan la lwa. Diferans nan jistis sosyal. Vizyon pati a ak doktrin pati a diferan de tout lòt pati sou tèren an. Lidè pati a gen anpil ide pou yon chanjman ki reyalizab. Se yon chanjman ki karakterize yon lòt modèl politik ak anbisyon ke lòt pati ki sou teren an pa ofri. Se mak fabrik pati Yon Lòt Chimen an. Modèl lidèchip pati sa a se fondman l. Se pa pati yon moun ou byen yon ti gwoup moun se yon pati ki kreye kòm yon modèl pou tout lòt pati ta kopye sou li.Se yon Konsèy ki dwe toujou dirije pati sa a. Konsèy sa a dwe ale nan eleksyon regilièman, chak premye janvye sa vle di kòmansman chak ane fòk konsèy sa a bay yon bilan piblik sou ki sa ki te fèt pandan ane a ak kombyen kòb pati a gen nan kès li. E ki sous kòb sa yo ki gen nan pati a. Manm konsèy yo pa ka pran de manda younn aprè lòt. Aprè chak manda pati a dwe realize yon kontwòl ofisyel sa nou rele odit nan lang franse a. Si rezilta odit sa a bay rezon pou pati a pouswiv moun sa yo, direktwa pati a dwe pote plent devan lajistis nan yon delè ki pa depase yon lane ou byen 365 jou. Aprè delè sa a pati a pap ka pouswiv moun sa a ankò. Yon moun ki gen yon odit negatif pap ka kandida nan konsèy pati a ankò men li ka toujou manm pati a sil ta vle.

Tout moun ki konpetan ka aspire pou vin dirije pati a depi moun nan pase nan eleksyon kredib ki fèt andedan pati a. Avan eleksyon gen yon komite nan pati a ki pou al menen ankèt sou kèlke swa moun ki vle eli a pou asire moun sa a pat gen yon pase kriminèl. Si komite sa a jwenn yon dosye sou moun sa a komite a dwe bay moun sa a kanè ak tout eksplikasyon piblikman. Desizyon konsèy pati Yon Lòt Chimen an pap janm desizyon yon grenn moun se desizyon tout moun li dwe ye. Pyès moun pa gen dwa pran desizyon ou byen pran la pawòl sou non pati a san se pa konsèy la ki bal dwa sa a sou papye.

Pati Yon Lòt Chimen prezante yon pwojè sosyete vizyonè e realis. Wap jwenn detay pwojè sosyete sa a nan liv pwogram pati a. Pwojè sosyete sa a envizaje mete kampe:

— Yon Leta ki pou restore ak leve figi peyi a;

— Yon ansanm de pwogram ki pou rann Leta fò, enpasyal, ki gen detèminasyon pou l modènize ekonomi peyi a;

— Yon strikti ki pou garanti yon eta de dwa ak yon strikti ki pou ede ranfòse lajistis;

— Konbat koripsyon ;

— Ofri Aysiyen an yon rezon pou l renmen peyi l ankò;

— Refòme ledikasyon;

— Ofri menm chans a tout Aysyen pou yo avanse nan la vi yo, kelkeswa kote aysyen an soti;

— Nan pwogram sa a pati a ofri plizyiè estrateji pou leta a fè enstitisyon yo mache epi kreye richès;

— Pati a gen plan Konstwi plizyè lekòl teknik ak sant inivèsitè;

— Menm jan ak edikasyon de baz, Pati a gen plan pou l kreye yon swen sante inivèsèl kote tout moun n ap gen dwa ak la sante;

— Pati a gen plan pou l remanye akò ak estrateji diplomatik yo, paske nou bezwen yon diplomasi kooperatif pou lanse gwo pwojè modèn ki pou mete peyi a sou ray developman.

V. Ki ideyoloji, filozofi Pati Yon Lòt Chimen an?

Doktrin politik ki nan baz mouvman saa se democrasi pwogresis, sa vle di zye tout manm pati a vize sou pwogrè e yo vle pwogrè pou tout moun san distenksyon. Nou gen misyon pou nou pran men chak Ayisyen pou nou leve yo nan kras yo twouve yo ye a. Pati a vle komanse ankadre tout moun pou ansanm tout moun ka mete men ansanm nan devlopman peyi a. Pati a pa anvizaje neglije ou byen mete pyès moun a kote paske peyi saa se pou tout Ayisyen ke li ye. Sèlman pati Yon Lòt Chimen vle kosyantize tout mounn, ankadre tout moun, ankouraje tout moun pou nou ka rive derasinen mizè ke peyi saa konnen depi endepandans li. Pati Yon Lòt Chimen vle kreye yon lòt modèl mantalite pou tout moun kapab patisipe nan konstriksyon yon nouvo Ayiti kote tout moun ka viv nan diyite.

Leta demokrat pwogresis saa ke pati Yon Lòt Chimen gen mission pou l kreye a vle asire libète pou tout moun, sa vle di pyès moun pa dwe siperyè pyès lòt devan la lwa. Pyès moun pa dwe gen kontwòl sou pyès lòt moun. Pati a vle asire ke pwogrè a ap ka rive ka chak fanmi kèlkeswa kote moun nan abite nan peyi a. Pati a konte favorize emèjans tout moun san patipri paske pati a kwè nan soulajman pou tout moun. Egalite pati a ap pale a se egalite devan la lwa. Pati a ap pale de egalité pou leta a trete tout moun menm jan san patipri, san enflyans koulè po ak estati sosyal pyès moum ou byen pozisyon ke yon moun genyen nan sosyete a. Nou rekonèt ke gen moun ki ka pretann ke se yo ki gen priorite nan tout bagay men pati Yon Lòt Chimen vle pèsiste sou ekite kote tout moun dwe benefisye menm dwa pou yo ka aspire a tout posiblite ke peyi a ofri yo.

Pati Yon Lòt Chimen sèmante pou l pa nan kraze brize ak dechoukay. Pati a pa nan kase fèy kouvri sa. Pati a rejte tout kalite patipri. Pati a dwe itilize tout kalite estrateji pou l kombat koripsyon. Pati a pa dakò ak moun ki ap degrade lavi politik peyi a. Pati a pa nan konpwomi ak pyès moun ki pa klè. Si yon manm pati a komèt yon krim la jistis gen dwa pou l pouswiv li jan l vle paske la jistis pa dwe fé politik. Patia kwè nan estabilité politik, sosyal ak ekonomik. Pati a kwè leta dwe respekte dwa tout moun. Pati a dwe fè tout efò nesesè pou sèvi popilasyon an. Pati a kwè nan bon jan ledikasyon ak bon jan lekòl pwofesyonel pou tout pitit peyi a. Pati a reve yon lòt Ayiti kote moun dwe viv ak diyite.

VI. Poukisa yon moun dwe vini manm Pati Yon Lòt Chimen?

Tout moun ki fatige ak jan Ayiti ap fonksyone la a ta dwe konsidere vin manm pati sa a. Tout moun ki bezwen yon van lespwa vante pou tout sa ki ap vini yo ta dwe konsidere vin manm pati sa a. Tout moun ki ta renmen mete valè yo ak eksperyans yo nan sèvis Ayiti ta dwe konsidere vin manm pati sa a. Si yon moun ta renmen pou Ayisyen parèy li yo konn valè l, pou yo apresyel kòm moun ki renmen peyi l, li ta dwe vinn manm pati saa. Si yon mounn ta vle prezate tèt le kòm yon ouvrye nan konstriksyon ak devlopman peyi Dayiti depi jodia moun sa a ta dwe vinn manm pati sa a. Si ou bezwen bay jènn gason ak jènn fanm nan peyi a yon rezon pou yo sispann al Chili, Brezil, Mexik, Turki, ou byen antre nan gang ebyen moman an rive pou ou vin fè pati de pati modèn sa a. Si ou vle sispann viv tankou yon senp konsomatè ki viktim de evènman ki ap pase nan peyi a chak jou se moman ideal pou ou afilye ou ak pati Yon Lòt Chimen. Si ou vle konprann nan ki mond ou ap viv, nan ki nivo Ayiti ye nan soudevlopman, ki kote Ayiti ye, ki kote pati saa vle mennen l ebyen se moman pou ou chwazi yon pati ki ka louvri zye ou. Si ou vle sispann viv nan la pèrèz, siw vle kontribiye nan chanjman peyi a, pati Yon Lòt chimen se pati pa ou la. Si ou vle fè yon bagay pou Ayiti pou ou reveye konsyans politik nasyon an, se moman pou ou entegre ou nan pati saa. Si ou ta renmen sispann koripsyon ki ap detwi peyi a, si ou jwenn posibilite pou ou chazi pi bon dirijan ak pi bon lidè pou dirije peyi a, alò Pati Yon Lòt Chimen se pati pati ou tap tann lan.

Si ou kwè ansanm nou ka leve defi Ayiti prezante la a, Si ou vle gen yon gwoup moun solidè ki ap toujou kanpe bò kote ou nan bon tan kou nan move moman, si ou vle patisipe nan yon pwojè sosyete ki ka rasanble tout Ayisyen poun vin devni yon gran nasyon ankò, si ou ta vle pou yo sispann imilye nou kelke swa kote nou rive nan mond lan, si ou ta vle pou lòt peyi yo respekte ou epi trete ou ak diyite, alò se moman pou ou deside afilye ou ak pati sa a. Si ou ta vle bay tout fòs ou pou change Ayiti, si ou ta renmen pitit ou ak pitit pitit ou toujou jwenn yon enstitisyon ki toujou la pou defann yo, yon enstitisyon ki gen yon plan ki pral pèmèt yo grandi san yo pa bzwen parenn ak marenn, ebyen ou gen rezon pou ou vinn afilye ou nan pati sa a.

Lè ou vinn manm Pati Yon Lòt Chimen ou pral jwenn yon ekip ki pral ankouraje ou pran fòmasyon pou ou ka konen ki sa ki demokrasi, ki dwa ou kòm moun, ou pral aprann ki sa ki politik, ki sa ki yon leta, ki sa ki gouvènans. Pati a ap ankourage tout manm li yo pou yo patisipe nan aktivite sosyal ak politik. Pati a ap asire ke tout moun byen fòme pou yon ka diferansye aksyon yo komparativman ak lòt pati sou tèren an. Pati a gen pwojè pou l mande fòmasyon entènasyonal pou yo ka gen yon lòt ide de koman devlopman fèt nan mond lan.

VII. Kijan yon moun ka vinn manm Pati Yon Lòt Chimen?

Yon moun ki vle angaje tèt li nan politik pou ede ak sèvi Ayiti tout bon epi ki vle fé pati yon pati politik; Yon moun ki enterese ak lide pati saa ap vann lan, ki vle non sèlman adopte yo men defann yo; Yon moun ki pat kondane deja ou byen ki pat mele nan fè krim kont peyia ou byen pyès lòt peyi, ki vle yon aktè nan chanjman peyia tout bon ka vin manm patia. Jan yon moun ka enskri nan patia, li ka prezante nan biwo patia ak dokiman li ou byen enskri dirèkteman sou sit entènèt patia ki se www. lanouvelleperspective.com oubyen rantre an kontak ak komite patia nan komin kote mounn saa ap viv la. Menm jan an tou, yon òganizasyon, yon asosyasyon, yon gwoup sosyoprofesyonel, yon baz, yon sèk literè kapab afilye ak pati Yon Lòt Chimen depi yo santi yo renmen e yo kwè nan ideoloji, vizyon, ak pwojè sosyete pati a.

VIII. Kiyes ki ka manm Pati Yon Lòt Chimen?

Tout moun ki se Ayisyen ki ap viv an Ayiti o swa deyò peyia ki:

1. Fòk li gen dizwit (18) an pou pi piti;

2. Li pat janm kondane pou yon krim; sa vle di li jwi de tout dwa sivil li;

3. Li prezante ak sètifika legal ki soti nan DCPJ ki montre ke li pa gen yon kazye jidisyè;

4. Li pa manm aktif yon lòt pati politik;

5. Li konpran ak pataje vizyon, ideoloji, filozofi ak pwojè sosyete patia;

6. Li prè poul patisipe nan devlopman peyi Dayiti;

7. Li dakò kotize pou kembe patia aktif sou tèrenan.

IX. Ki valè Pati Yon Lòt Chimen ap defann?

Pati Yon Lòt Chimen rasanble moun ki kwe nan valè sa yo :

1. Libète 2. Entegrite 3. Travay 4. Pwogrè 5. Patriyotis

6. Jenerozite 7. Lwayote 8. Diyite

X. Ki kote Pati Yon Lòt Chimen vle rive ?

Nou vle fè tout sa ki posib pou Ayiti rive rekipere diyite l epi pou nou ka komanse ak devlopman peyi a pou tout bon. Nou pa vle pou jenerasyon pa nou an pase pou Ayiti pa chanje. Kom yon nouvo pati politik, nou vle chanje jan politik fèt an Ayiti. Nou vle ofri yon politik san koripsyon, san kliyantelis, san vyolans. Jenerasyon saa gen yon devwa istorik pou chanje eskanp figi peyi dAyiti.

XI. Ki koulè pati a?

Pati Yon Lot Chimen gen yon sèl koulè:

Koulè ofisyel pati se Ble Tikwaz kòd dijital koulè saa se (#25fde9), li ka chanje depi 2/3 manm yo deside chanjel. Ble a vle di serenite ak trankilite, li reprezante intèlijans, lwayote ak responsablite. Ble se yon koulè ki sembolize la pè.

XII. Ki Sembòl pati a?

Sembòl pati Yon Lòt Chimen se yon tab tou won ki kouvri ak drapo ayisyenan epi ki gen chèz ki menm wotè nan tout wonn tab saa. Tab won saa ak chèz menm wotè yo sembolize ekite sa vle di tout mounn gen menm vale nan patia.

XIII. Kiyes Ki ap finanse Pati saa?

Pati politik Yon Lòt Chimen vle fè yon chanjman nan zafè finansman paske patia pa wè tèt li menm jan ak tout lòt pati yo. Patia konte mete sou pye yon yon estrikti ki rele Asosyasyon Sipotè pou Yon Lòt Chimen ki gen pou misyon pou ranmase lajan, organize aktivite ki ka rantre lajan, vann sèvis ak vann pwodwi. Patia ap toujou remèt rapò ak asosyasyon sa chak trimès men li ap gen poul bay yon rapò ofisyel premye janvye chak ane konsa nap ka itilize transparans saa poun ka kombat koripsyon. Men patia, an menm tan, ap toujou resevwa kotizasyon manm li yo, ak finansman piblik ki disponib pou li.

XIV. Ki alyans ki posib nan patia ?

Pati Yon Lòt Chimen Kwè nan yon gwo kowalisyon pou chanjman paske patia kòmm enstitisyon pa gen tout zouti kel bezwen, ni solisyon tou fèt. Se pou sa patia ap aksepte afilyasyon gwoup ògànize ki vle kontribye nan angajman pou pwogrè. Amplis pati Yon Lòt Chimen ka kolabore ak pati politik ki gen menm ideologi ak li.

XV. Poukisa yon lòt pati an plis de tout lòt ki genyen déjà yo ?

Paske nou prezante yon pwojè sosyete ke pyès lòt pati pa prezante. Anplis nou rantre nan yon lòt epòk ki mande yon lòt kalite politik, lòt aktè sou sènn politik la. Yon epòk ki mande demokrat ki pa kowonpi, lidè ki gen sans sivik, moral ak atachman ak listwa, ki kwè politik se younn nan fason pou yo montre yo renmen Ayiti. Paske politisyen ki sou tèren yan da montre yo pa gen kapasite pou yo rezoud pwoblèm peyi a genyen. Menm elit entèlektyel la parèt inpwisan devan sa ki ap pase yo e yo montre yo paka adapte ak nouvel reyalite. Paske pwojè pou fè Ayiti vin yon gran peyi a se yon pwojè sostete ak yon pwojè sosyo-politik ki komplike anpil. Paske jenerasyon nou an te bezwen yon espas politik pou lide li yo pran fòm; paske bagay yo dwe fèt yon lòt fason an Ayiti. Ayiti bezwen yon lòt pati ki gen repondong ki pou ofril yon demen miyò.

XVI. Kijan pati a oganize?

Pati a genyen:

1. Yon konsèy ki ap dirijel ki gen yon manda de (2) lane. Men chak premye janvye konsèy saa gen poul reuni ofisyelman poul bay rapòl de sal fè nan ane ki sòt pasea. Eleksyon konsèy la ap fèt nan konvansyon ofisyel patia chak de (2) lane. Chak ane yon manm nan konsey la eli kom prezidan. Okenn prezidan pa ka pran de manda younn apre lòt. Men li ka tounen apre chak de eleksyon.

2. Se konsèy ki nome yon Sekretè General ki okipe jesyon kotidyen patia. Se li ki responsab pou pwogrè patia ke nan peyia kòmm a letranje. Se li menm, an akò ak konsèy la, ki gen reponsablite poul chwazi pòt pawòl ak mounn ki ap fè pwomosyon pou patia.

3. Asanble kominal yo ki tankou palman patia ki syeje chak premye janvye lè rapò anyel la ap bay. Se reprezantan komin yo ak seksyon kominal yo. Se mounn sa yo ki reprezante bazo u byen fondasyon patia. Tout gwo desizyon politik yo dwe pran lè saa men yo dwe ratidye pandan konansyon yo.

4. Nan chak komin ak chak seksyon kominal patia dwe gen reprezantanl. Reprezantan sa yo dwepatisipe nan reunyon anyel yo menm jan ak konvansyon patia san distenksyon.

5. Patia dwe mete sou pye yon konsey electoral ki responsab pou realice tout kalite eleksyon an dedan patia.

6. Lekòl patia rele Universite Nouvelle Perpective ki ap gen andedanl yon fakilte de gouvènans pou fome manm yo ak kandida yo ak tout lòt mounn ki vle.

7. Patia ap ankouraje atelye de travay, tab wond, gwoup fokis, gwoup refleksyon pou nou ka gen yon ekip ki ap panse tout tan.

1. Abaky ROBERT 2. Chela DEVILMA 3. Lambert OSE 4. Rodolph VALÉUS

5. Boaz TRANQUILLE 6. Jean-Philippe PAUL 7. Julio LOISEAU 8. Roosevelt PAYOT

9. Sadrax ULYSSE 10. Francilien DEUSMA 11. Ednise PIERRE 12. Claudine LOUIS

13. Chedeline CHARLES 14. Jean B. JOSEPH 15. Wilnor DOL 16. Daphcar CHARLES

17. Reynald FELIZOR 18. Roolph J. LOISEAU 19. Blenda MERLAN 20. Carole DORCIUS

21. Frantcise LEVOY 22. Rodrigue DESORMEAU 23. Michel-Ange ULYSSE 24. Dorothy MARC

25. James PINKET 26. Jean F. JACKSON 27. Ficia VPLCY 28. Wansort EUSTACHE

29. Claudine LOUIJUSTE 30. Carlos CATUAL 31. Amos PAUL 32 Benji GUENON

33. Marguerite BOSSUET 34. Manouchka LOISEAU 35. Laubert LOVINSKY 36. Rodney JEUDY

37. Ruth JEROME 38. Kempes LOIS 39. Job LOUIME 40. Fritz AURIEN

41. Daniel GENELUS 42. Widzer JJEUDI 43. Jephtey LOISEAU 44. James NOEL

45. Eugene TREUS 46. Evaldy DOSAR 47. Magdalena PRISTIS 48. Marie SAIMPRICE

49. Bruny DAVID 50. Jesula LOUIS 51. Magonese PIERRISE 52. Shakespeare ZEPHIR

53. Baner ARCHILES 54. Ficia VORBE 55. Juitma CHRISTOPHE 56. Jean RENE